Patahunan Bahau. By iyakan Puntukan

Posted by Mohammad G. Indalal 2011/02/23
Alhamdulillah, pudji duk sanglit si Tuhan Magpapanjari katilingkal alam. Duk salawat duk kasanyangan si panghu’ te bi Muhammad kahinapusan Nabi duk Rasul.

Dambuli;

Mag-indan patahunanin lamud amban me kalalagihan me manusiya dambuwa kawman atawa lahat, sarta tabilan fardou kifaya si me Muslim manuntut ilmu ne inin (ilmu falak) pegge’ niya parsugpatan ne duk kasinduwehan me’ ibadat, kuwe’ ne me’ pagtekka bulan puwase duk bulan paghadji ye ne tabilang siye amban me’ rukun Islam lime.

Elimu’ iyan pasulaput iye amban duwe labeyan pangahati iye; kaissa’ nen amban pagsahari bulan duk paglinep ne bulan-bulan duk ye inin asal-asal nen. Kaduwe nen amban pagsilak mata ellew duk pagseddep ne ellew-ellew (inin asal-asal nen mangkin iye pinda magkulang maglabi amban siyampu ellew). Amban sabab iyan, saplag si kalahat-lahat kaniya-kaniya maghinang kalindariyu de luu ne ke tinuhut labeyan mata bulan (lunar calendar pain bahasa inglisin) atawa isab labeyan mata ellew (solar calendar bang si bahasa inglis). Damikkiyan magbidda-bidda du isab pagtagnaan de pag-itungan patahunanin, me’ bangsa sinain dehellu siye ibuhan tahun mag-itung patahunan, damikkiyan me’ injanin duk me’ aa misir-in kaniya-kaniya siye iyan duk itungan patahunan de. Sampay manjari bawag si entero dunya sampay kuitu inin ne ye ne magtagna siye mag-itung amban kapanganak Nabi Isa alayhis salam duk tinenteman de inantananin ye labeyan pag-itung ellew ye ne ngabut ne siye kuitu duwe ngibu duk sampuk dambuwa (2011) tahun ye ne ginellal we bahasa inglisin (Gregorian calendar) atawa (Taqwim Miladi) sambat bahasa arabin. Puwas ien tekka Islamin si tangan Nabi Muhammad sallallahu alayhi wa sallam, sampay finardu we Allah subey kite muwase dambulan dem dantahun, duk kawajiban kite maghadji hap Makkah si waktu tartantu, apabila du isab tagees te mapihin, na billai maghajat agama ten subey mag-indan duk mag-itung patahunan, ye ne magtayakkup kemon me’ sahabatin magtagna’ amban bulan Muharram duk ngitung siye nagna' amban tahun paghijra Nabi te Muhammad sallallahu alayhi wa sallam amban Makkah tudju Madina, ye ne bantu si bahasa inglis (Hijrah Calendar) ngabut ne kite kuit dangibu ampat hatus duk tellumpuk duwe (1432) amban tahun ye paglalin Nabi tebi Muhammad sallahu alayhi wasallam ley.

Si dambuli masa, magsawuganti’ me’ manusiyain ngalibut katilingkal dunya pipitu si bidda-bidda aka duk hajat sampay magleggey-ileggey ne pangaddatin bangsahin hap saddi bangsa, maglawlamud ne pangadjiin, kulang ne amban siye makaliley duk makapinig panghati matumawwa duk manggain. Amban sabab ien, dambuwa ne tahinang pangaddatan si antara’ de pakaniya-kaniya ye ne magsagina siye si panagnaat tahun duk me’ ginis-ginis ne lalabetan. Upama nen, pain arabin “KULLU AM WA ATUM BI KHAIR” atawa kan “AAMUN JADID ASSAID” duk ekka pe billai. Me ien ga’ ien niya poon ne amban Agama te Islam we’ subey hininang me’ parkala’ ley, sali’ du kaniyaan nen Hijri atawa miladi. Sumaguwa’ wajib hadja isab subey niya’ ingat tau te we’ paasek ne isab tahun bahauhin.

Si kuitu, ekka teeran takite mata tebi duk takale taynge tebi, sampay bang patekka matuk pe kitebi magpain “HAPPY NEW YEAR” bang taabut si kahinapusan bulan Disembel sampay panagnaan bulan Janwari, ye ne patuhut si aturan pag-itung ellew. Inin me’ pongtinai ku si agama, subey kitebi anib duk pateng si parkala inin. Sabab nen, hininang pangaddatan duk pinahadje iye we’ me tumpukan manusiya dumain mag-agama Islam, sarta’ binilang pe we’ de lamud amban pangeh agama de, panuttukan ne kiristiyanin masaplag pangaddatan inin mula-mula ne si lahat Yurup (Europe) duk Mirika (America) sampay taboo ne hap Asya (Asia) kaekkahan nen tampal silangan sarta hadje tibungkelan nen si uttara (north) Pilipinas duk tengnga ne, lapey ne pitu si me’ kahadjehan lahat si satan (south) Pilipinas ye ne sampay tapale me’ bale-bale nen dem kakawmanan me’ Muslim. Amban sabab ien, tarrang teed si agama te Islam kaharam nen, pegge me inin sahadje-hadje pangilalehan te satru Islam si tenged pamahadje (celebration) de iye. Na subey kitebi paanib manamal matuk-matuk magsagina duk “HAPPY NEW YEAR” iyan, pegge binandaan kite we Nabi tebi sallallahu alayhi wa sallam: (sine-sine ninged-ninged si kakahinang me’ satru, na lamud ne siye lai).

Allahu Taalah du labi mangatauhan mabennalin.

0 comments

Post a Comment

Tausug post

archive

Followers

Usbawaris

free counters

About Me

My Photo
Mohammad G. Indalal
sponsored by:Ustaza:hadji Amina Ampao.
View my complete profile