1. Weey kitebi pinapanjari we' ALLAHU TAALA(الله تعالى) ine maksud nen?
Panilew tu daran ne hep ituh maglatun-latun duk tabangkil si mata-taynge sin parangan parangan amban kite sah sambatan dambuwah pungtinai tu dambuwah amban meh masaallah subey daran sinabbut supaya ellum diyem pangisbat sin tiyap-tiyap manusiyah.
In kapapanjari si kite Manusiyah biddah amban kapapanjari sin binatang or ine ine makhluk pinapanjari weh ALLAHU Subhananhu Wa Taala in tandah nen si Ellew Qiyamat mag imangkan manusiyain pain ne si ayat tasabbut diyalem Qur'an Mahamulliya "Ya Laytani Kuntu Turaban",maksud nen: " Weey pe hatu ku tahinang manusiyah, sarun miyaan tahinang ne hadja ku bulak". Magkainagen manusiyain si waktu ley sarang tahinang bulak ne hadja iye peggeh bulakin gey ne hinukum.
Sambatan sin magtatarasul:
ولو أنا إذا متنا تركنا لكان الموت نهاية كل خلق، ولكنا إذا متنا حسبنا ونسأل بعدها عن كل شيئ
Hatinen: Bang hadja hep miyaan puas kite matey pinasagaran ne kite, tantu in kamatey hinapusan ne sin kemon pinapanjari. Sumeguwah tuwih bang kite matey palabey pe kite paghisab, pag ubus meke kite tinilew pasal kemon ine ine bakas tahinang ten.
In manusiyah special makhluk pinapanjari weh ALLAH si ellet sin nature sin Malaikat duk Hinayep. Weey hangkan si ellet? Pasal in malaikat binettaran akkal sah gah niyah napsu ne, lawan isab sin hinayep basag napsu nen sah ganah akkal ne. Adapun in manusiyah sinampurnah luu si iye in ine maniyah si duwe inin binettaran iye akkal duk napsu. Iye hep inenan napsu ley lai lamud ne napsu mamanganin, nginum,mag anda, tuli…etc.
In binatang or hinayep gey ne labey hinisab ellew qiyamat kuweh paghisab manusiyain, misan siye hinukum bang si antarah de hadja, saupama takomes meyong dambuwain danganin si mata ne binangun hadja siye karuwe hinukum males hadja ngomes meyong miyaan si mata bakas mangomes si iyehin ubus tadawhat de pain kaadilanin pinabalik ne siye hap bulak.
Pinapanjari sin Allahu Subhanahu wa Taala in meh hinayep inin supaya mag khidmat si manusiyah hangkan gah ne siye binettaran akkal supaya siye taguna te. Pihun koh bang kabettaran ne akkal kabewin bang kew yan gey boo ne maglugat, weey ku subey taraak nu maglalas pahagad bu salih du isab kite taga akkal?
So peggeh kite taga akkalin o kew pungtinai ku manusiyah, akkal inin subey guna te. Bintung te balik hap akkal te in panilew inin weey ku tiyah tuu si dunya inin? Ine kamaksuran pagpapanjari Tuhan si akuhin? Supaya hadja mangan? atawa tuli? Atawa mag anak-anda?
Bang in maksud nen magpaniyah manusiyah supaya hadja mangan, uy na mas expert in Etek mangan amban kite, peggeh etekin misan tepparan nu kinakan nen diyem pisak puwah ne ru: In kabew damikkiyan, gey magkalagihan laley duk basu ngaseb hadja sabet si higad higad sin lame esso ne iye.
Bang isab maksud nen magpaniyah si kite supaya hadja tuli, uy na in kabeg mas pandey amban manusiyah magtuli. Peggeh kabegin gey magkalagihan uan duk tepo atawa kama, kabegin mag exhibition pe bang tuli, pabowet bowet diyatah pange duk bettis pe diyatah kok diyawah, leddek pe tulinen misan pelah pelah ellew.
Bang isab kite pinapanjari supaya hadja mag-anak anda, mag iskul duk supaya ngasuwah hinang tanam duk makahinang lumah lingkat, uy na hatu bauu ne hadja papanjari ne, bauuhin gah niyah problema ne pasal boo boo ne lumah ne tungan tungan.
ALLAHU AKBAR. Hadje kamaksuran magbayah-bayain hangkan kite paniyah ne.
Jawab ne si ayat daran du sinabbut si kite weh meh kaguruhan tebi kalasahanin, parman sin ALLAH diyem Qur'an mahamulliya:
" و ما خلقت الجن و لإنس إلا ليعبدون"
Maksud sin ayat: " Gah pinapanjari weh ku in Bangsa Jinn duk Manusiyah buwat malayingkan supaya siye mag-ibadat si aku". Ine in maksud sin Ibadat lai, in maksud sin ibadat dumain hadja limited si sambahayang lime waktu, atawa puase si bulan Ramadhan or mag hadjih hap Makka. In maksud sin ibadat lai kemon kidjut pamaranan duk hinang nun diyem 24 oras,ellew-ellew. Peggeh bang tebteb sambahayang du in inenan ibadat piye minit du dambuwah sambahayangin 5 minutes du more or less. Bang sai 25 minit du kew mag ibadat hap Tuhan ellew-ellew. Dumain sailih, sah in inenan ibadat langkum in kemon hinang nu diyalem sin 24 oras. In patuli nu, in pamangan nu, in pag-anak anda nu, pag usaha nu, in kemon ilih bang tumuhut si aturan binettad si kau weh Tuhan Rabbul Aalameen duk pamanduh sin Rasulullah Muhammad Sallallahu Alayhi Wasallam in kemon ih meh Tuwan meh Dayang bilang ibadat duk tantu tinimbang duk hinukum si kau weh ALLAHU TAALA si ellew qiyamat.
Gey kalugatan manusiyain si ellew qiyamat weey iye gah makapag ibadat sabab yuh luu si iye in akkal.
Karuwe nen pinaboohan pe iye suntuan, manoan si iye sin aturan sin pag ibadat tasabbut iye ne in meh karasulan duk kahinapusan den iye ne in junjungan duk suntuan te Rasulullah Muhammad Sallallahu Alayhi Wasallam.
In Rasulullah niyah aturan ne si kemon kakahinang nen. Aturan ne bang mangan saupama, magbismillah, mangan duk kanawan dumain bibang. Nahut aslag sin hinang sin rasulullah niyah aturan ne luu binettad weh ALLAHU TAALA pangupihan sin kite Ummat ne bangsa Manusiyah., ultimo misan ngalurah pangannal te gah ne niyah halgah ne sah taga aturan pe in Rasul S.A.W. bang ilih tatuhut te pungtinai ku manusiyah, in kemon kidjut duk kakahinang nun bang nuhut si Sarah sin ALLAH duk aturan sin Rasulullah Sallallahu Alayhi Wasallam in alen ne ilih IBADAT. Bang ilih tahinang te, nah tadawhat te ne in maksud sin pagpapanjari si kite sin ALLAH Tuhan sin kemon Aalam iye ne in mag IBADAT si iye.
Wallahu A'lam bissawab, ambat sah pabentel meh kaguruhan ten bang niyah gah tumawwah si meh ta lukis ku ley.
Tumahah ne teed, kalu ru niyah waktu ku misita balik si kawman usba waris inin, sugpatan ku sah si taabut ku in meh sinduwe masaallah ley.
Salam dwaa kami duk kasilasa si kaam kemon kapungtinaihan diyem kawman USBAWARIS.
0 comments