01-Tagnaan ku in kemon lapal kabatangan duk hilalaungan ku, lapey ne in ammal ibadat ku si alen allahutaalla, malasa si kemon pinapanjari duk labi makasi maase si meh ipun ne.
Pasal pagbassa sin ayat amban meh ka ayat ayatan dem qur-an, subey tinagnaan duk bismillahirrahmanirrahim, puwas billai si parihalan pag bassa sin (bismillahirrahmanirrahim) si diyalem sambahayang magparrak in meh ampat mujahab si tellu kawul 1-bang pusi imam malik gah ne ilamud weh ne amban surah alfatiha
2-bang si imam safie lamud amban ayat fatiha, 3- si meh sinduwe imam pinalamud wehde si tiyap tiyap surah.
Si parihalan tenged pagpatanug duk gey pagpatanug sin bismillah si diyalem sambahayang si tellu waktu kuweh ne 1- waktu magrib 2-waktu esah 3-waktu subuh, nah makajari ru iye binassa pinatanug duk gey pinatanug,duk gey binassa,
Gey kite bi makajari ngabahtal, ngandah dah atawa kan gey nuhut si pamaham de duk pikilan ineddo weh de amban meh purna ulama atawa kan imam sin tiyap tiyap ummat islam amban ampat mujahab.
Si parihalan pag inum makan, lapey ne si pag asek badju pag-asek tawumpa duk si ine ine ne tibayhuan kawul piil duk umbang payaw te nah subey iye tinagnaan sin (bismillah) hasupya makahasil barakat amban allahutaalla,
Si tenged pag-ayir atawa kan pag wuduh, mamarahi ne massa sadja sin kalima (bissmillah) si gey ne binassa kemon in bissmillah hirrahmanirrahim,
02 الْحَمْدُ لِلَّهِ رَبِّ الْعَالَمِينَ:
02- in fatiha, inalenan duk binansagan iye inah sin kitab atawan kan inah sin qur-an, bat sabab iyene iyan in panagnaan sinulat si qur-an duk sarta wajib binassa si tiyap tiyap rakaat si diyalem sambahayang, sarta in iye pitu ayat, duk gey tinayma in sambahayang si gey tabassa luu si diyalem ne in suratul al-fatiha, pain meh mananapseer in fatiha minduwe iye pinaturun weh allahutaallah, mintedde si makka duk mintedde si madinah.
(In sampurna pupunjihan duk sasanglitan teppet si mahasutci allah, tuhan tag amulahi si kemon alam.)
in kalima alhamdulilla magmahna iye panginduwa duk pagsukur tunggal si allahutaala,
In tiyap tiyap pakaradjaan tekka si bangsa manusia sibuh du haggut pasuh, rizziki hekka neke atawa kan kulang niya duk gah, subey pinadeket si bigi jantung duk si pikilan sarta ilagtik weh della ekhlas amban pangateyan in kalimah (ALHAMDULLLAH) tanda paglillah si allahutaalla.
In kalima (alhamdulillah) iyene sa hap hap lapal kabtangan ilagtik weh della supaya tahinang sabab kahasil te karidaan sin allahutaallah, sarta iyene lapal parsababan pangalasa kau sin mahasutsi allah,
Hingga dem pekew parasahan atawa kan si kasigpitan, samantara luu pe si kau in kaellum nun, subey daran in pagsabbut sin kalimah alhamdulillah, dumain ne sadja kitebi magsukur bang kitebi katekkahan arta salaksa, atawa kan pagnakura, luu neke magkamali kaam, kulang, hekka, duk gah, subey du kaam magsukur, tanda paglilla bi,si dalil sin gah niya ne saddi magbayah tunggal in allah,
Subey hati te bi pahap,gey tebi teed taikapat weh allahutaalla,hatatkala daran pangesseb tebi si iye duk pagsabbut atawan pagjikir pagtasbih sin kalimah alhamdulilla.
(Allahu ahlam bissawab)
allahutaalla in labi makahati sinkasampurnaan ne
03الرَّحْمَنِ:
03- (malasa maase) makasi si ipun moslim kapil duk kemon ne tapapanjari si babew dunya, gah niya pininig, pinakakan ginastauhan, pinapanjari in rizki weh allahutaalla si babew dunya para si ipun, magdul bayah kaam nginum mangan, adapun rahmat allahutaalla dambuwa du pinaduwaihnen si babew dunya kagastuhan kemon moslim kapil magduhul bayah kaam nginum mangan si gey magka ubus.
-03الرَّحِيم:
03-(maase)Nah bang taabut si ellew dambuli pineneh weh allahutaalla,yeru kinalasahanen muhmeen, nah kapil hap narka jahanam gey ne magsali kuweh si dunya hin, muhmeen hap surga, pagtekka si surgah si siyampuh duk siyam rahmat ne hekka rizki si ellew dambuli, sumagawa kulang mangan sabab siyampuh duk siyam rahamt ne, si dunya dambuwa du si dunyahin makakan ne kaam kemon ine ine kabayaan bi kinakan, sainge ne bang si ellew damabuli siyampuh duk siyam rahamat tuhan,
pinaku ru si kaamin dinaak kaam pasujud nambahayang duk nuhut sarah qur-an duk hadis nabi mohammad sallallahu alaihi wasallam, sumagawa kahekkahan amban kaam pinahadje bin sarah magkapinadahin, buwat adapun sarah allahutaalla yene qur-an gey magkapinda gey ngalaung kaam gamman nunyukan kaam pikilan hap, duk nuran kaam hap surga si gah niya pagbista.
04مَالِكِ يَوْمِ الدِّينِ
04-(Allahutaalla magbayah si ellew qiyamah duk tagdapuh ellew qiyamah) duk magnakaura si ellew qiyamah, nah pungtinae ku si agama islam tiyap tiyap kaam pinagnakuraan subey kaam nuhut sarah duk pinturu, gah niya saddi labeyan subey hininang malaingkan ammal ibadat sambahayang pasal gey ne kaam kapasuwey, dakaam bimbang duk suse amban pagdayah si dumain halal duk da kaam bimbang si pagnakura, pag tekka in waktu nambahayang kaam iyan du makatabangin pag taabut kaam si ellew pinag nakuraan,
hatihun bi pahap niya ellew pagtilew pagtammat si kemon ipun tinelew ne kaam, sine ne painne magnakura si ellew inin, nah allahutaalla magbayah duk magnakura in, nah sainge sah paharap bi si tuhan bang gah niya ammal ibadat bi, gey ne magguna pagdayahin, duk pagnakura bin, magsusunne magsusunin, magtangis ne bang magtangisin, ngasang ne bang mangasangin, ngillahap ne bang mangillahapin, weey be paine gah ku kapag ammal ibadat, nah gey ne magmumpaat si kaam susunin sangsah kaam tinepparan senessekan hap narka jahannam,
kabtangan si omar kinalasahan weh allahutaala sahabat rasullulla sallallahu alaihi wasallam, bistahun bi dehellu baran bin si gey pe tekka ellew pagbista, duk timbangun bi baran bin si gey pe tekka ellew pagtimbang gey ne kaam tumapuk magtapukan kuwe si dunyahin, paguwa ne kemon kagilahan bin, kemon kudjil kahibal bin si dunyahin dem listahan, luu ne mangandupangin, luu ne manangkewin, luu ne magmahsiyatin, luu ne makuriputin, luu ne duwal manampakin luu ne maputinganin luu ne mag-usaha mag-anak sinin, luu ne mamapateyin, kaam du mamasa kitab bin si ellew pagtammat.
Nah in mohmeen magkegkeg ne palaksuh ne bang mapalaksuhin hawa kegden, manjari nilew ne meh tanarkain si tasurgah in, pain tanarkah in sainge paasek bi surga iyan, sambung tasurga in pain de 1-bang kami jinuri atawa kan sinigaan atawa kan pinakitalew pagsabar kami, 2-duk bang kami pinakaatan atawa kan jinuri in kami magpahap hap si siye, 3-duk bang kami pamakuhan tabang arta niya sigpit kaelluman de tabang kami, kinawugtu neke pakan kami, atawa kan katekkahan kasusehan gey pasagran kami, duk gey kuriputan kami, nah magsusun ne meh dayahanin duk magnakurah gey ma adilin sambil siye sinessekan tudju narka jahannam.
-05إِيَّاكَ نَعْبُدُ وَإِيَّاكَ نَسْتَعِينُ:
05- (Gah niya saddi pasujuran kami, duk gah niya saddi pamakuhan kami tabang tunggal kau) nah pungtinae ku si agama islam nah bang kaam mabayah maku pagdayah, duk pagnakura labi labi nen ilmu tuhan, paharap kaam maku si allahutaalla, tuhan mag-urungin duk managgain, kahekkahan amban kaam maku tabang si meh kajinjinan duk shaitan magkillahapan magbahasa maku tabang, atawa kan palengan magpapayam bulan duk ellew duk oras sampay minit gey ne kalumengananin, pasal ngagad bulan duk ellew ne duk magpaliggit ko bahasa pawas si sin hasupaya nguntung, nahas ko painne, iyan amban kakahinang sirik sakutu si allahutaalla haram haram,
subey kaam ngandel si tuhan magbayah si kemon tapapanjari duk magsarahakan, niya qur-an ngakahan kaam, duk hadis nabi mohammad sallallahu alaihi wasallam, hatihun bi pahap asal kaam dem undang undang allahutaalla bang tasulat si kaam subey magjatu gah dapat, sumagawa duwaa si allahutaalla makasagang iyehin duk makasapaat iyehin, andang isab niya janji tuhan si kaam bang kaam nganduwa maku tinaymah, kahekkahan amban kaam lisuh nilew si ka guruhan dakaam palisuh luu in ilmuh tuhanin duk hadis mohammad sallallahu alaihi wasallam, siye maka pahamin nelew kaam.
06اهْدِنَا الصِّرَاطَ الْمُسْتَقِيمَ:
06-(Hidayatanun kami si lan bentel) nah pungtinae ku si agama islam in hidayat kalagihan pinaku si allahutaalla sababan maka sannang kaam duk sababan maka hap pikilan duk sababan mabaya kaam ngahati ilmu agama islam, duk sababan nunyukan kaam pikilan sannang amban kemon hinang makahap kaam si anak anda bi, si pungtinae bi, si matattoe bi, duk makahap pag-usaha bi duk si usba waris bi duk si pagnakura bi si kawman bi lagi luba maut kaam hap surga.
Maana hidayat (iman,) noan kaam si lan bentel pikilan hap duk pagpabasag pamaratsaya si tuhan, bang mikit ne si kaam in hidayat gey ne kaam tagengo ngengo weh meh bangsa satru, duk meh arta dumain halal si kaam, in arta allahutaalla banes subey dinaak kaam weh allahutaalla miha arta usaha gah niya siggul sagga ne minsan kuweh diki dikian tapung, hidayat hatihun nuran kaam hap surga,
Bang manusiya duwal si panensongan minsan dumain si iye eddoh ne, magdapuh, ngungkal, nigah, ngagew, pegge iye bahasa labung pamilya nen, atawa kan bahani atawa kan hekka sinapang ne, gey katikbih tikbian nampak, makitalew duk sadjata ne, nah sipat gah pe kahidayatan, makaase, makaluuy, sumuh duk sumuddeh gey ru tapaglagi ne gamman nuran iye hap narka jahannam, kaam kahidayatanin dumain isab gamman sinuknaan sabab pungtinae bi ih, subey isab daran pinakuhan si tuhan bang man siye hinidayatan weh allahutaalla, teggel samet nen,
7 صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ:
07- (kuweh meh siye kahidayatannu meh kanabi nabihan,mohmeen sampurna duk meh siye mabasag mag-ammal ibadat ley) duk pa saddihun kami isab amban kasuknaan weh nu meh bangsa yahudi duk kapil, bangsa kapil duk yahudi kasuknaan ne siye laung ubus ilaung pe weh de baran den tahati re niya agama islam, sumagawa gey siye mabayah ngahati pegge bang siye ngahati agama islam leppas pain de agama ren.
pungtinae ku si agama islam anak bi atawa kan puntinae bi sali bi,bang kaam kasulutan si julbahasa si yakan iyan tawfix amban allahutaalla,bang niya gah katawwaan bi pagmaana ku maaf duk maku ku ampun si allahutaalla,sali bi bang niya malih ne sahawihun bi sah duk magsulat sah kaam,(usba92@yahoo.com
0 comments