Usbawaris Islamic Centre

Sarang kahap bang niya' tilew bu hap isab in sambung nen, landu' kalingkat bang niya' missa bu sab nya' pakale, sa' luu ne kew kalaat nen, bang matoo manilewin bu manambungin maglola' maghinang dagey, bu binnaan manilew ley baya' ngahati kasabennalan, atawa baya' matarrang pagkutu' kutuan ne, atawa mastian pagduwe duwe han ne, masahi paghinang ne, landu' kapas bang aa tau nambungan aa awam duk kalolaan,atawa paghinang dagey, aa matauhin subey patengan hantang tilewin, aa manilewin subey pahantap ne tilew nen, sabab nen, bang saien kahalanin gana' kajatuhan ilmuin duk gana' kamunfaatan pagpangadjiin, pagpasaplag ten janan magkakaat bang dumain si aturan hangkan subey pahap te bi in labeyan nen subey ngasambu atawa magmumpaat in panali' tebi agama ten bin supaya taliley te mahap duk malaatin mahalal duk maharamin, masutsi duk malemmiin'..

Allahu taala tinoan kite we' ne aturan pagpasampay supaya hap in buwa' nen, damikkiyan tengge ten subey pahap te, farman Allahu taala:

(( أدع إلى سبيل ربك بالحكمة والموعظة الحسنة وجادلهم بالتي هي أحسن

)) (( Ngabi'2x kew tudju lan Allahu taala ( agama ne ) duk boohan hap duk bisssa hap ( nasihat, advise) hap duk sarta' boohun siye magsambung jawab si iye labi mahapin.

Bang kite baya' kinahagad subey kite Ikhlas duk magparumbus bus tudju Allahu taala, da kite magkalolaan,atawa magtakabbur, atawa maghinang dagey, bu ne in kite mamasaplag ley da ne subey angut te we' subey tatuhut si kitehin, iye manisisitahin kapamasampay kite

(( وما علينا إلا البلاغ ))

sipat ten subey kowe' sipat sin me' kanabi nabihan, kinahagad kite duk gai bang kite bakas makapasampay iye ru si kite hin (( mamasampayin hadja )) ingat te (( الدال إلى الخير كفاعله )) iye makato' si kahapanin kowe' du makahinang ne, damikkiyan nen hati te, in kite maesseb hadja kite sabab iye du iye ien makatabang sin me' aa magparatsayahin

(( وذكر فإن الذكر تنفع المؤمنين ))

(( maesseb kew sabab bennal2x in pag paessebin makatabang si me' aa magparatsaya)).

Matilewin wajib si aa gana' panghati ne

(( فاسألوا أهل الذكر إن كنتم لا تعلمون ))

Farman Allahu taala (( Tilewun bi me' aa makahatihin bang kaniyaan bin gey katauhan bi)) Sainin aturan nen, bang kite nilew subey pahap te, duk subey pakaeddoan te ilmu' atawa pangadji', dumain panuley suley atawa pagkalolaan,atawa paghinang dagey.. panilewin tenga' ne amban panghati sabab nen pukun nu makahati ne saban pamariksa' nu ley.

Sa' bang kite nilew subey hadja ara'2x si kahapan atawa niya' buwa' ne hap sababan amban patilewan teley, da kite nilew bang tahati te janan laat si kite, farman Allahu taala

(( ولا تسألو عن أشياء إن تبد لكم تسؤكم ))

(( Da kaam nilew me' pakadjaan bang tahati bi janan laat si kaam))

Iye me' tasabbut ley subey kimmatan te bi meke hap in labey pagpaguwa' te bi akkal pikilanin si tenged pag agama te bi, aturan ien, subey tahati we' te bi.

Si pasal isab pag sambung si me' masail (discussions) subey kite bi mag addat inaddat si me' aturan pagtilew damikkiyan aturan pagsambung, sali' du kaniyaan ten langkew pangadji' nen atawa diyawa' kowe' aku ley upama, pain Imam Shafie Rahimahullah
(( ما جادلت عالما إلا وغلبته وما جادلت جاهلا إلا وغلبني ))

( Ga' Ku bakas makadiscuss alim malaingkan taraag hadja we' ku, duk ga' ku bakas makadiscuss jahil malaingkan taraag hadja ku we' ne)) Maksud nen aa hin bang langkew pangadji' nen, bisan du katauhan ne si iyehin matumawwain atas ne, pahali sabab kadiyawa' boohan ne, sa' in aa gana' panghati ne sali du tumawwa' si iyehin duk gai, asal subey ien matoohin, hangkan hep saien bissa Imam Shafieehin.

Aku inin dambuwa' pongtinai bi maesseb si kite bi dangan parangan, kalu kalu du pain isab makatabang si parahimpunan te bi inin, maku ku kamaafan si kaam, dambuli amban kapamaku ku kaampunan amban Allahu taala.